Hinglishpedia

Wajan kam karne ke 25 Tips.
Jaroor, Aap apna wajan jaldi se kam kar sakte hain. Kai saari diet hain jo tezi se wajan kam karne mein madad karti hain.

Sabse accha tarika yeh hain ki kai pounds wajan ko ek dum se kam karne ke mukable dheere-dheere wajan kam karna sabse accha hota hain. Kai experts ka manna hain ki aap bina dieting kiye bhi wajan kam kar sakte hain. Bas aapko apni lifestyle mein kuch jaroori changes karne padenge.

Aaiye jante hain ki Bina Dieting ke Wajan kam kaise kiya jata hain. Tips for Weight loss without going dieting in Hindi/Urdu. Wajan kam karne ke 25 tarike aur tips.

1. Jyada se jyada sabziya khaye :- Raat ke khane mein sirf ek sabzi ki bajaye 3 sabziya serve kare, Jyada phal aur sabziya khane se wajan ko asaani se kam kiya ja sakta hain.


2. Pizza ki behtar slice banaye :- Pizza ke upar sajane ke liye meat ki jagah sabziyo ka istemal kare, Isse aap apne bhojan se 100 calorie kam kar sakte hain.


3. Green tea piye :- Green Tea peene se aap asaani se wajan ko kam kar sakte hain.


4. 8:00 Baje ke baad khana khane se bache :- Raat ko 8 baje ke baad khana khane se bachna chahiye. Raat ko 8 baje se pahle khana hi accha rahta hain. Is tarah aap khane ke waqt se pahle jyada nashta nahi khayenge. Agar aisa karna mushkil lagta hain, toh khane ke vichaar ko hatane ke liye kuch herbal chai le ya khana ke turant baad apne daant brush kar le.


5. Bhojan se pahle phal khaye :- Kisi bhi bhaari bhojan se kam se kam 30 minutes pahle Phal khane ki salah di jati hain. Is tarah phal jaldi pach jate hain. Khali pet phal khane se aapka system toxins free ho jata hain aur wajan kam karne ke liye aapko jyada energy deta hain.


6. Majboot Mint Gum chabaye :- Agar aapko snacks lene ki iccha ho, tab tez flavour wali Sugarfree Gum ko chabaye. Bina Soche-Samjhe snacks khane ki aadat hame T.V. Dekhte waqt, Khana banate waqt, Party mein Baat-Cheet karte waqt aur Internet Surfing ke dauran hote hain. Ek acche flavour wali chewing gum dusre padartho ka beat kar deti hain, aur aap unhealthy snacks ko khane se bach jate hain.


7. Yoga aur Meditation kare :- Ek research ke anusaar jo ladies yoga karti hain, Unme dusro ke mukable wajan kam karne ki zyada capacity hoti hain. Niyamit Yoga karne se khana khane mein control rahta hain.


8. Sugar kam khaye :- Niyamit roop se liye jane wale Soda jaise Sugar wale Drinks ki jagah Paani ya Zero Calorie wale Fruits Juice le. Chini se door rahna aapke liye bahut hi jaroori hain.


9. Bhojan ko chaba-chaba kar khaye :- Apna bhojan chaba kar khaye, ek 20 minutes ka timer set kare aur dekhe aap kitne dheeme khate hain. Wajan kam karne ke liye yeh jaroor hain ki harek bite ko slowly slowly chaba kar khaye.


10. Ghar ka khana khaye :- Ek research mein yeh pata chala jo log ghar ka bana khana khate hain, Veh oon logo ke mukable asaani se wajan kam kar lete hain, Jinhe bahar ke khane ki aadat hoti hain. Isliye yeh rule follow kare, bahar ke khane ko na khaye, balki ghar ka bana khana hi khaye, Isse aap asaani se wajan kam kar sakte hain.


11. Sharab limit matra mein piye ya na piye :- Sharab mein Carbohydrate ya protein ki tulna mein 1 gram jyada calorie hoti hain. Sharab ke saath aap Chips, Snacks, Moongfali aur dusri cheezo ko bina soche samjhe khane lagte hain. Isliye ho sake toh Sharab se door rahe. Isse aap apna wajan easily loss kar sakte hain.


12. Daily breakfast kare ;- Kai log sochte hain ki subah ka naashta na karne se calorie kam kiya ja sakta hain. Lekin veh aamtaur par din bhar mein zyada khate hain. Acchi din ki shuruvaat ke liye aap ek katora sirf anaaz aur phal aur low fat wala doodh le sakte hain.


13. Jaroorat se zyada khana na pakaye :- Jaroorat se jyada khane ko pakane se aapke bhojan mein mauzood poshak tatv khatm ho jate hain ya phir kam ho jate hain. Jiski wajah se aap satisfy nahi ho pate hain aur aap junk food lena shuru kar dete hain. Ise door karne ke liye Shushi ya kaccha Salad khaye. Microwave mein jyada pake khane ko khane se bache.


14. Khane ki thaali ke size ko chota kare :- Dophar ke khane ke liye 12 inch ki thaali ki bajaye 10 inch ki thaali ka istemal kare. Isse aap thaali mein kam bhojan paros payenge aur kam kha payenge.


15. Non-Vegetarian hone se bache :- Aksar Shaakahaari bhojan slim hone ke liye acchi aadat mani gyi hain. Shakahaari log maansahaari logo ke mukable zyada tezi se wajan kam karte hain. Kyonki sabziyo mein zyada matra mein Fiber hote hain jo wajan kam karne ke liye jaroori hain.


16. Lambe-patle glass ka istemal kare ;- Liquid wali cheezo se milne wali calorie ko kam karne ke liye aap chote aur chaude glass ki jagah patle aur lambe glass ka istemal kare. Isse aap Sharab, Soda ya koi bhi dusri liquid 25% se 30% tak kam piyenge.


17. Apni purani jeans aur kapdo ko dekhe :- Wajan kam karne ke liye aap apni purani jeans aur kapde ko dekhe, Aisa karne se aapke ander wajan kam karne ke liye yeh accha inspiration milega aur aap wajan kam karne ke prati positive sochenge.


18. Khane ki ek diary banaye :- Aap din bhar kya kha rahe hain, iski ek diary banaye, isse aapko pata chalega ki aap kitni baar kha rahe hain. Oon cheezo ke bare mein bhi pata chalega, jis par aap apna control nahi rakh pa rahe hain. Iske baad aap oon cheezo ko control karne ke liye aap soch sakte hain. Yeh kaam mushkil hain, lekin kuch minutes hi lagte hain apni khane ki aadat ko daily diary mein likhne ke liye.


19. Soup Pijiye ;- Bhojan ki shuruvaat mein soup pijiye, kYonki yeh aapi bhookh ko control karta hain aur khana khane ki prakriya ko dheema kar deta hain. Cream wale soup na piye, kyonki ise high fat aur calorie hoti hain.


20. Lal Sauce ka istemal kare :- Tamatar wale Lal sauce Cream wale sauce ke mukable bahut kam fat aur calorie wali hoti hain. Lekin yaad rakhe ki inka istemal bhi kam hi kiya jana chahiye.


21. Kam khana parose :- Khane mein rojana sirf 10% se 20% kam khana parose, Isse aap kam khate hain aur aap asaani se wajan kam kar sakte hain.


22. Jyada neend le :- Ek research ke mutabik sirf 1 ghanta zyada neend lene se bhi aap wajan kam kar sakte hain. Kyonki aap so kar bekaar ke snacks khane se bach jate hain aur aap apna wajan kam kar lete hain.


23. Calorie burn kare ;- Bina dieting ke aap calorie burn karke bhi wajan kam kar sakte hain, Iske liye aap Garden ki ghaas kaate, ghar ki safaai kare, jogging kare aur bhi kai aise kaam kare jisme physical movement ki jaroorat hoti ho. Isse aap rojana 100 calorie ko bhi burn kar sakte hain. Sharirik kaam karne se aap apna wajan asaani se kam kar sakte hain.


24. Rook-rook kar khaye :- Wajan kam karne ke liye khana khate samay rook-rook kar khaye, Isse aap zyada nahi kha payenge, aur asaani se wajan kam kar sakte hain.


25. Khud ko shabashi de :- Jab aap soda ya sharab ki aadat chhode toh khud ko shabashi de, Agar aap pure din snacks na khaye toh khud ko shabashi de aur apni peeth thapthapaye. Aap sliming lifestyle ke kareeb aa chuke hain, jo aapke khane ki aadat ko control karne mein aapki help karti hain.


 
Top