Hinglishpedia

Smoking Chhudane ke liye Nicotine Chewing gum ka istemal kaise kare.
Tobacco mein Nicotine hota hain. Lagatar Tobacco ka istemal karne se hamare body ke kuch parts sensitive ho jate hain jis wajah se tambaku ya cigarette chhodna bahut mushkil ho jata hain. Isko chhudane ke liye Nicotine Replacement Therapy ka istemal kiya jata hain.

Tobacco ya Cigarette ke alawa aur kisi tarike se body mein nicotine pahuchane ko Nicotine Replacement Tharepy (NRT) kaha jata hain. Smoking ki aadat ko chhudane ke liye NRT ka istemal kiya jata hain. Iske liye nicotine ke chewing gum, spray, inhaler, patch aadi diye jate hain, Lekin in sabme sabse asaan tarika hain Chewing gum chabana. NRT ko W.H.O. ne approve kiya hain. Nicotine gum ko chewing gum ki tarah lagatar nahi chabana chahiye, Balki kuch der chaba kar mooh mein rakh le, phir kuch der baad chabaye. Isse nicotine dheere-dheere nikalta hain aur nicotine ki talab kam ho jati hain. Lagatar chabane se teekhapan badhta hain.

In NRT Chewing gum mein kam matraa mein nicotine hota hain aur dhuyein mein paye jane wale toxins isme nahi hote hain. NRT chewing gum ka aim saaf hain, yeh dheere-dheere nicotine ki matra ko kam karke nicotine ki latt ko door karna hain. Isme Nicotine ki matra kam hoti hain, Isliye tobacco ya cigarette chhodne ke baad iski latt lagne ke chances kafi kam hote hain. Nicotine therapy se tobacco ki latt aur Smoking chhodne ke chances 50 se 70% tak hote hain. NRT ke jariye smoking chhudane ke liye 12 hafto tak ka target rakhna chahiye.

Pahle hafte tak rojana 12 chewing gum, agle hafte mein rojana 11 chewing gum aur har hafte 1 kam karke 12 hafto mein smoking aur nicotine, dono ki latt ko aap chhuda sakte hain. 12 Hafte baad sharir ko nicotine ki jaroorat nahi lagegi.

Sirf NRT se hi smoking chhodna mumkin nahi hain. Isse sirf Nicotine ki craving kam hoti hain aur smoking chhodne par hone wali dikkato se nibatne mein madad milti hain.

Kisi bhi Nicotine product ko use karne se pahle doctor se salah jaroor leni chahiye. Khas karke diabetes patient, BP ke mareez , Cholesterol patient, Pregnant woman ya doodh pilane wali maao ko NRT shuru karne se pahle Doctor se salah jaroor le.


loading...
 
Top