Hinglishpedia

0
I.A.S. ki taiyaari kabse shuru kar deni chahiye.  IAS mein jaane ka dream dekhne wale students ke mann mein yeh question lagatar bana rahta hain ki aakhir veh behad tuff exam ki taiyaari kab se shuru kare. Sach kahe, Zindagi ke tamam important questions ke tarah is swaal ka bhi koi nishchit, saral aur seedha jawab nahi hain. Is baat mein koi shaq nahi hain ki world ki sabse tuff exam mein se ek IAS exam mein success paane ke liye planning aur taiyaari ki jaroorat hoti hain. Swaal bas yehi uthata hain ki aakhir yeh planning aur taiyaari kab se shuru kar deni chahiye. Aakhir official taur par is priksha ki taiyaari ki koi samayseema nahi hain. 

Is baat ko lekar bhram tab aur bhi badh jata hain, jab har saal is exam ke toppers apni taiyaari se related alag-alag byaan dete hain. Ek aor aise toppers hain, Jinhone 10 th se hi iss exam ke liye khud ko taiyaar karna shuru ka diya tha. Vahi dusri aor aise bhi log dekhe gye hain, jinhone graduation ke baad mahaz 1 saal taiyaari karke pahle ki koshish mein baazi maar li. Aise mein anek students iss confusion mein pad jate hain veh inme se kisko follow kare, kaun si planning banaye.


• School level par taiyaari :- Aise students , jinke family mein ek ya ek se jyada IAS officer huye hain, Aksar school ke time hi iski taiyaari karna shuru kar dete hain. Is approach ke fayde aur nuksaan dono hain. Isme koi shaq nahi hain itni jaldi taiyaari shuru karne se neev majboot banti hain. Student NCERT ki school books vistaar se padhna shuru kar sakte hain. Yeh books I.A.S mein success paane ke liye bahut hi upyogi saabit hoti hain. Inhe padhkar aap IAS exam mein cover hone wale topics ko acchi tarah se jaan-samajh sakenge. Mote taur par dekha jaye , toh iss exam ki taiyaari ko 3 bhaago mein baanta ja sakta hain.

Sikke ka dusra pahlu yeh hain ki School level se taiyaari karne wale students jab tak UPSC Civil Services exam mein baithne ki paatrata pa jaye, tab tak exam ka pattern, syllabus, trends aadi mein kafi changes aane-jaane ki sambhavna rahti hain. Agar aisa hua toh ab tak ki gayi sabhi mehnat bekar chale jane ka khatra rahta hain. Ek aur khatra yeh hain ki itne pahle se taiyaari karne ke baad agar ummeedvaar pahle ek-do koshisho se exam ko clear nahi kar paye, toh veh thakaan aur oob ka shikaar hokar IAS karne ka irada hi chhod sakte hain.

• Graduation level par taiyaari :- Graduation ki padhai ka samay student life ka sabse romanchak samay mana jata hain. Yahi IAS ki taiyaari karne ka sabse golden period kaha jata hain. Yeh taiyaari self study aur coaching ke roop mein ki ja sakti hain. Is exam ki minimum education requirement graduation hi hain. Isliye Graduation pura karte hi candidate UPSC ke exam mein baith sakte hain aur is dauran exam ke pattern mein koi bada badlaav aane ki sambhavna na ke barabar hi rahti hain.

Is period mein taiyaari karne ka bada fayda yeh hota hain ki aap degree paate hi UPSC exam mein apna first attempt kar sakte hain aur aapke paas aur koshisho ke liye prayapt samay bhi rahta hain aur utsaah bhi. IAS toppers mein sabse jyada quantity oon youths ki hain jinhone graduation ke dauran hi is exam ki taiyaari shuru kar di thi.

Agar iske nuksaan ki baat ki jaaye toh graduation ki padhaai karne ke saath IAS ki taiyaari karne se aapke paas extra circular activities ke liye time nahi mil pata hain.

• Graduation ke baad :- Is exam ki taiyaari aksar veh log karte hain, jinhe IAS mein jane ki prerna der se mili ho. Kai log kahte hain ki Graduation karne ke baad IAS ki taiyaari karna bahut der ka mamla banta hain aur aapko success nahi mil sakti hain. Iske bawjood statics batate hain ki aise kai saare yuva hain jinhone graduation karne ke baad IAS ki taiyaari ki aur veh safal bhi huye. Yeh yuva apna pura time aur energy is exam ki taiyaari mein de sakte hain. Aise mein unki taiyaari jyada focused rahti hain. Aur phir graduation kar chuke yuva apne subject mein acchi knowledge bhi paa chuke hote hain. Yeh baat IAS ki exam mein sachmuch mein faydemand saabit hoti hain.

Yeh toh hui IAS ki taiyaari shuru karne ke 3 period. Lekin kai mamlo mein yeh dekha gya hain ki kai yuvaon ne graduation karne ke baad koi job karni shuru kar di thi aur baad mein IAS mein jaane ka irada kar iske exam diye aur isme safalta bhi prapt ki. Isse pata chalta hain ki I.A.S ki taiyaari karne ka koi sahi period nahi hain. Darasal sahi samay se jyada important hain ki iss exam ko clear karne ke liye aapki lagan aur hard work kya hain. Issi hard work aur dignity ke bal par aap is IAS ki priksha ko pass kar sakte hain.


Post a Comment

 
Top