Hinglishpedia

Air Conditioner Kya aap naya Air Conditioner (A.C.) khareedna chahte hain ya phir khareedne ja rahe hain? lekin aapke mann mein yeh swaal hain ki kaun sa A.C. khareede? Ek samay tha jab Air conditioner vilashta ka dusra naam tha, lekin jaise-jaise lifestyle mein change aaye aur aam aadmi khas karke Middle class ki buying capacity badhi, AC ek jaroorat ban gya.

Garmiyo ke mausam mein Air conditioner ki abhi jaroorat bhi hain aur samay ke saath status ki demand bhi hain. Duniya bhar ki tamam chhoti se badi companies iska production kar rahi hain. Window aur Split ke baad ab Portable AC bhi bazaar mein available hain. Lekin ek badi confusion hain ki kaun sa AC khareed jaye. AC ki capacity kya ho aur kaun sa variant behtar hoga. Vaise agar aap bhi in swaalo mein ulajhe hain to aapke liye hamare paas kuch jawab hain ;- 

Electricity Consumable :- A.C. khareedne se pahle yeh jaroor dekhe ki aapka A.C. kitni bijali ki khapt karta hain, Kyonki mahine ke aakhiri mein bill aapko hi chukana hain. Acchi baat yeh hain ki ab har electronic samaan par bijali ki bachat ko lekar Star rating chipka hota hain. Jitni jyada Star Rating utni jyada product ki keemat. Lekin AC khareedte waqt kam se kam 3 star rating wala product lena hi sahi rahega, aap apni suvidha ke anusaar 4 ya 5 star wala AC bhi khareed sakte hain.

Size ya Capacity :- Air Conditioner khareedte samay sabse badi confusion uske size ya capacity ko lekar hoti hain. Yeh seedhe taur par room, hall ya oos jagah ke size par depend karta hain, Jaha AC ko install kiya jana hain. Kyonki big rooms mein small AC kai ghanto ki bijali khapat karne ke baad bhi kuch khas asar nahi kar pate hain. 

Square feet ke lihaz se agar aapke kamre ka floor 90Sqft se chota hain to aapke liye 0.8 Ton ka AC sahi rahega. Jabki 90-120 Sqft wali jagah ke liye 1.0 ton ka AC, 120-180 Sqft jagah ke liye 1.5 Ton ka AC aur 180 Sqft se badi jagah ke liye 2.0 Ton ka AC khareedna sahi rahega. 

Window, Split ya portable :- AC ke 3 variants mein apni-apni khoobiya hain, Window AC anya 2 variants ke mukable thoda sasta hota hain. Lekin iski awaaz thodi jyada hoti hain. Yeh single room aur chhote kamro ke liye behtarin hain. Asaani se install hota hain. Lekin khoobsurati ke mamle mein Split AC se pichhad jata hain. 

Split AC mein iske component ko bahar kanhi bhi install karne ki suvidha rahti hain. Air flow jyada hone ke karan yeh big room ke liye sahi hain. Component bahar install hota hain, lihaza chalne ki wajah se shor nahi hota hain. Dikhne mein bhi khubsoorat hota hain. Lekin Window AC ke mukable Split AC thoda mehanga hota hain. Yeh badhe kamre aur hall ko thanda kar deta hain. Yeh 2 parts mein aata hain, Iska ek part room ke bahar ya chhatt par lagaya jata hain aur dusra kamre ke ander. Yani ki ise ek kamre aur ek jagah par fix karna padta hain. Jagah badalne ki suvidha nahi hoti hain. 

Portable AC bhi in dino apni khoobiyo ke karan bahut pasand kiya ja raha hain. Iski sabse badi khoobi yeh hain ki ise apni jaroorat ke anusaar kanhi bhi kisi bhi kamre ya haal ke area mein rakha ja sakta hain. Installation ka jhanjhat nahi. Aap khud bhi ise ek jagah se dursi jagah shift kar sakte hain. 

Filter, Air Flow, Swing :- Ek good AC ka chunaav isliye mayne mein important hain ki aap uski hawa mein saans bhi lete hain , Yani ki AC mein badhiya Filter laga hona jaroori hain. Air Flow yeh tay karta hain ki aapka AC aapke kamre ko kitni jaldi thanda karta hain. Jaroori hain ki AC mein Cooling Fan ki speed ko tay karne ki suvidha ho. Kam se kam 2 Fan ki speed ho, Jise aap apne hisab se ON kar sake. Split aur Portable AC mein Swing ki suvidha hoti hain. Ab kuch Window AC mein bhi yeh feature aane lage hain. Halaki ki yeh thoda mehnga bhi hota hain. AC ko samay-samay par servicing ki bhi jaroorat hoti hain. Yeh sirf isliye jaroori hain taki aapka AC saalo saal chale, Balki isliye bhi jaroori hain ki AC ki safaai ho aur aapko fresh healthy hawa mile.

Dusri jaroori baatein :- Kai AC mein Timer ki bhi suvidha hoti hain. Yeh alarm ki tarah ka ek feature hain, jise set karne par yeh niyat samay ON aur niyat samay par Off ho jata hain. Isse aapke bijali ki khapat bhi kam hoti hain aur kamra jaroorat se jyada thanda bhi nahi hota hain. Iske liye kai AC mein sensor bhi lage huye hote hain jo kamre ke temperature ko check karte hain.

Voltage Stabilizer :- AC ke saath Voltage Stabilizer  khareedne ki bhi salah di jati hain. Yeh sahi bhi hain aur jaroori bhi hain. Agar aapka AC 0.5 se 0.8 ton ka hain to iske saath 2 KVA ka Stabilizer sahi rahega. 1.0 Ton se 1.2 Ton ke AC ke liye 3 KVA ka, 1.2 se 1.6 Ton AC ke liye 4 KVA ka , 2.0-2.5 Ton ke liye 5 KVA aur 3 Ton se adhik capacity wale AC ke liye 6 KVA ka Stabilizer sahi rahega.  
loading...


 
Top