Hinglishpedia

1
Photo of Pan ke patte
Pan ke patte ke fayde aur gharelu nuskhe (Benefits of Paan/Betel Leaf & home Remedies) ke baare mein jab aap janenge to kahenge bhai Paan ke kya kahne. Halaki ki kai log iska sahi dhang se istemal nahi karte hain balki ise ek nashila padarth bana kar lete hain. Jarde wala paan, Gutakha (Tobacco)  aadi mila kar ise khate hain jo ki iske guno ko khatm kar deta hain aur mooh ke cancer hone ki wajah ban jata hain. Lekin aaj ki post mein hum Pan ke negative point ko chhodkar ise ek medicine ke roop mein dekhenge aur ise sahi dhang se upyog karke isse labh lenge.

Pan Indian tradition ka ek aham hissa hain. Khana khane ke baad mooh ka jayka banaye rakhne ke liye Pan bahut ki kargar hain. Vahi har shubh avsar par Paan ke patte ka upyog pooja aadi ke liye kiya jata hain. Iska ek karan Paan ke patte ka subhta ka parteek hona hain, vahi isme chhupe aushdhiya gun bhi ise pujan mein rakhe jane ka ek bada karan hain. Aaiye jante hain Paan ke patte ke gharelu nuskhe aur fayde ;- 

1. Khansi :- Paan ke 15 patto ko 3 glass paani mein daal le. Iske baad, Ise tab tak ubaale, jab tak paani ubal kar 1/3 na rah jaye. Ise din mein 3 baar piye.

2. Bronchitis :- Pan ke 7 patto ko 2 cup paani mein rock sugar ke saath ubaale. Jab paani ek glass rah jaye to usay din mein teen baar piye. Bronchitis mein labh hoga.

3. Sharir ki durgandh :- 5 Pan ke patto ko 2 cup paani mein ubale. Jab paani ek cup rah jaye to oos paani ko dophar ke samay pee le. Sharir ki durgandh door ho jayegi. 

4. Jalna :- Paan ke patte ko pees kar jale huye jagah par lagaye. Kuch der baad is paste ko dho de aur vaha Shahad laga kar chhod de. Ghaav jaldi theek ho jata hain. 

5. Nakseer :- Garmiyo ke dino mein Naak se khoon aane par Paan ke patte ko masalkar soonghe. Isse bahut jaldi aaram milega. 

6. Chhale ;- Mooh mein chhale ho jane par Paan ko chabaye aur baad mein paani se kulla kar le. Aisa din mein 2 baar kare. Rahat milegi. Aap chahe to jyada Kattha lagwa kar Meetha paan kha sakte hain. 

7. Lal aur jalan karti aankhe :- 5-6 Chhote pan ke patto ko le aur unhe ek glass paani mein ubaale. Is paani se aankho par chhite maare. Aankho ko kafi aaram milega. 

8. Khujali ya daane : - Paan ke 20 patto ko paani mein ubaale. Acchi tarah se ubalne ke baad is paani se naha le. Khujali ki samsya khatm ho jayegi. 

9. Masoodho se khoon aana ;- 2 Cup Paani mein 4 pan ke patte ko dal kar ubaal le. Is paani se garare kare. Masoodho se khoon aana band ho jayega. 

10. Stanpan (Breast Feeding) karwane ki samsya ;- Paan ke kuch patto ko le. Inhe dhone ke baad in par tel laga kar halka sa garm kar le aur gunguna hone par ise stano (Breast Nipples) ke aas-paas rakhe, isse sujan chali jayegi aur bacche ko doodh pilane mein asaani hogi. 

11. Mooh ki badboo :- Paan ke patte chaba le ya paani mein ubaal kar garare kare. Mooh se badboo ki samsya door ho jayegi. 

12. Moohase :- Paan ke 8 patte acchi tarah se pees le. Ise 2 glass paani mein gadha hone tak ubaale. Baad mein ise face-pack ki tarah istemal kare. Moohase door ho jayenge.

13. Safed Paani ki samsya hone par :- Paan ke 11 patte 2.5 Liter paani mein ubaal le. Is paani se apni Yoni (Vagina) ko dhoye. Safed paani aane ki samsya mein aaram milega.

Arey bhai jab pan ke itne hi fayde hain to Bollywood ka yeh mashoor gaana hame yaad aata hain aap bhi is gaane ka maja le..... 


 


Post a Comment

  1. Sir bahut hi accha Post hain Paan ke gharelu nuskhe aur upay ke baare. Hum mein se jyadatar log ise ek nasha maante hain, Lekin aapki Post Paan ke patte se hone wale fayde janne ke baad aaj main Paan ke pattiyo se pyaar karne laga hua... thanks Sir aap aise hi acchi tips likhte rahe... Thanks..

    ReplyDelete

 
Top