Hinglishpedia

Photo Kali Mirch (Black Pepper)Kali Mirch khane ke bade hi fayde hain, Kali mirch (Black Pepper)  ke kai gharelu nuskhe aur upay hain, jisse aapko kai bimariyo aur samsyaon mein  bahut labh milta hain.Kali Mirch ke teekhe swaad ke karan iska bahut hi kam istemal kiya jata hain, Lekin anek prakar ki bimariyo mein Kali Mirch ka istemal gharelu nuskhe ke taur par kiya jata hain. Pet, Skin aur haddiyo se judi problems ko door karne mein Kali Mirch bahut jyada asardar hoti hain. Aaj Janenge ki iska kaise aur kitni matra mein istemal karke rogo ko door kiya ja sakta hain.



Pet ke keede hote hain door 

Pet dard ka karan sirf kharab khan-pan hi nahi hota hain, Balki keede bhi iski wajah ho sakte hain. Isse bhookh kam lagti hain aur wajan tezi ke saath ghatne lagta hain. Inhe door karne ke liye Chhachh mein Kali Mirch ka powder mila kar piye. Iske alawa Kali Mirch ko Kismish ke saath mila kar khane se bhi pet ke keede door hote hain.



Bawasir mein rahat 

Unhealthy lifestyle ke saath hi oily aur junk food ke karan bawasir ki samsya aajkal jyadatar logo ko preshan kar rahi hain. Isse chhutkara pane ke liye Jeera, Kali Mirch aur Chini ya Mishri ko pees kar ek saath mila le. Subah-Shaam do se teen baar ise lene se bawasir mein rahat milti hain.


Gathiya rog mein labh 

Umar badhne ke saath hi hone wale gathiya rog mein Kali mirch ka istemal bahut hi faydemand hota hain. Ise Til ke Tel mein jalne tak garam kare. Uske baad is tel ko thanda hone par dard wali jagah aadi par lagaye aapko bahut hi aaram milega.


Sahi Metabolism 

Kali Mirch Metabolism ko behtar banati hain. Yeh Calorie burn karne ke saath hi pet ke Fat ko bhi kam karti hain. Motape ki samsya mein Kali Mirch bahut hi faydemand hoti hain. Isse pet se judi kai saari bimariya bhi theek ho jati hain.


Jukam mein aaram 

Jukam hone par Doodh mein kali mirch mila kar halka garm karke piye. Isse jukam mein rahat milegi. Khansi hone par bhi Kali Mirch ko Shahad ke saath mila kar chaate. Din mein teen-chaar baar aisa karne se Khansi door ho jati hain. Iska Teekha Swaad Jukaam mein band gale aur naak ki problem ko bhi door karta hain.  


Daant Dard ko door kare 

Kali mirch ka istemla daanto ke liye bhi faydemand hain. Iske rojana sewan se daant kharab hone ki samsya khatm hoti hain. Daant ke dard mein bhi kali mirch ka istemal bahut hi faydemand hain. Yeh skin ko bhi healthy banata hain. Ise khane se tavcha sambandhi kai saari bimariya door hoti hain. 


Acidity se chhutkara 

Kali Mirch ko Kale Namak ke saath Nimbu ke ras mein milaye aur is ras ko dheere-dheere piye. Acidity mein bahut had tak labh milta hain. Ek cup garam paani mein peesi huyi kali mirch aur Nimbu ka ras mila kar peene se gas ki shikayat door hoti hain.




Blood pressure control kare 

Blood pressure ko control karne mein bhi kali mirch faydemand sabit hoti hain. Agar samsya badh rahi hain to aadha glass paani mein ek chhota chammach Kali mirch powder daal kar piye. Jald aaram milega.


Kali Mirch ke kuch Desi Nuskhe :- 

1. Aankhon ki roshini ke liye :- Ek patashe mein 1-2 Kali mirch subah khali pet chaba kar khaye. Ek kilo chini ki chaar taar ki chashni bana kar usme 100gram Ghee, 25 gram Kali Mirch, 100 Gram Punarnava ki jad, 25 Gram Mulethi, 50 Gram Shatavari aur 50 Gram Triphala (Sabhi ka powder) milaye. Sharad purnima ki raat ko chandrma ki roshini mein ek thaali mein ise jamaye. Iske pees kaat le. Ek pees rojana 30 dino tak khaye. Aankhon ki roshini ke ilawa aankho se judi kai saari preshaniya door ho jayengi.


2. Cough, Khansi, dama aur kharash :- Ek chammach Shahad mein Adrak ka ras aur 4-5 Kali mirch pees kar milaye aur subah-shaam ko ise chaate. 10 Kali mirch, 10 patashe, 5 Tulsi ke patte, 1 Badi Elaichi aur thodi si Adrak ko pees kar 250 ml Paani mein dheemi aanch par ubaale. 200ml paani bachne par ise chhan le. Ab isme 2 chammach Shahad mila kar dheere-dheere piye. Isse Sardi-Jukam aur cough ki samsya mein aaram milta hain.


3. Migraine :- 5 Kali Mirch aur 3 Badam ko pees le. Isme 1/4 chammach Safed Chandan, 1/4 chammach Lal Chandan, thoda Kapoor aur Ghee mila kar seer par lep kare. Aisa lagatar 10-15 dino tak kare. Isse sar-dard aur migraine ki samsya mein fayda hota hain.


Dyaan de :- Naak se khoon aane par, Pet ya Peshab mein Jalan hone par, Garbhvati Mahila (Pregnant Women) aur 2 saal se kam umar ke baccho ko Kali Mirch ka Istemal nahi karna chahiye, Kyonki iski Taseer garm hoti hain.
loading...


 
Top