Hinglishpedia

1
Online ShoppingIndia mein online shopping ka vyapar lagatar badh raha hain. Gadgets, Electronics, Cloth, Footwear, Home Appliance, Furniture har cheez online khareedi ja sakti hain. Iski badi wajah yeh hain ki yaha par har product market price se jyada saste mil jate hain. Aapko aise tips batane ja rahe hain, jo Online shopping ke samay aapke kaam aa sakte hain. 


Aap kisi product ko online khareedna chahte hain to internet par kai saari website mil jayengi, Lekin sabse jaroori hain ki aap sahi website ka chunaav kare. Yeh isliye jaroori hain kyonki baat  product ki quality ke saath aapke paise se judi hoti hain. Aise mein jab kisi product ko khareede sabse pahle uski market price ke baare mein pata kar le. Baad mein yeh dekhe ki online shopping se kitna fayda ho raha hain. Saath hi product ki delivery kab milegi. Online Shopping ke liye Bharat mein jin Websites ka sabse jyada istemal kiya jata hain vah yeh hain... 

www.snapdeal.com
www.flipkart.com
www.yepme.com
www.paytm.com
www.jabong.com
www.shopclues.com
www.myntra.com

Inke alawa kai aur bhi kai websites hain, jo online products sale karti hain.


Keemat ki tulna kare (Compare with price) 

Online shopping par logo ko jo sabse jyada fayda hota hain vah kisi product ka kam keemat par milna. Aise mein shopping karte waqt keemat ki tulna karna bilkul bhi na bhoole. Kai baar 2 alag-alag website par kisi product ki keemat mein 100 rupaye se lekar 500 rupaye tak ka difference aa jata hain. Aise mein aap koi mehnga aur sasta koi products lene se pahle uske price ko alag-alag website par compare jaroor kare. Saath hi product ki asal keemat bhi jaroor dekhe. Sabse jaroori baat, kai baar 2 products ke model number mein mamooli antar hota hain, Lekin keemat puri tarah se alag hoti hain. Aise mein product ke model par jaroor dhyaan de. 


Big Offers / Aaj ka offer

Har online website kai products par big offers deti hain. Saath hi Aaj ka offer bhi deti hain. Aise mein jaroori hain ki agar aap kisi product ko khareed rahe hain to usay dono category mein jaroor dekhe. In websites par kai baar Kisi din, Hafte ya phir festival ke samay 50% tak ka discount mil jata hain. Aise mein jo log online shopping karte hain ve in offers par jaroor nazar rakhe.


Coupon aur promotional code ka istemal :- 

Online Sale karne wali kai websites customers ko offer coupon aur promotions code bhi send karti rahti hain. In codes ke message bhi aapke mobile mein aate rahte hain. Saath hi yeh bonus point bhi dete hain. In sabhi baaton ka fayda yeh hota hain ki jab aap online shopping karenge, tab offer coupon, Promotional code aur bonus point ke istemal se oos product ki keemat kam ho jati hain.   


Exchange offfer :- 

Kai users naya product khareedna chahte hain. Saath hi, apne purane product ko bechna chahte hain. Aise mein ve exchange offer ka istemal kar sakte hain. Yani ki koi user apne purane phone ko online exchange kar naya smartphone khareed sakta hain. Is tarah ke offers mein company aapke purane products se jude huye kuch swaal puchati hain aur phir uski exchange keemat aapko bata deti hain.




Cash on Delivery 

Online shopping mein Cash on Delivery sabse accha option mana jata hain. Ise COD kahte hain. Is option ke chalte users apna product lene ke baad uski keemat deta hain. Jab aap koi product khareedte hain to payment ke saath COD aur EMI ke option mauzood rahte hain. Aise mein aap COD ka chunaav kar sakte hain.




Free Shipping :- 

Aap shopping ke dauran jab bhi koi product khareede, to is baat ka dhyaan rakhe ki uski shipping free hain ya nahi. Darasal kai product par website free shipping nahi deti hain aur delivery ke waqt uski keemat aapko chukaani padti hain. Aise mein Free shipping ka hona bhi jaroori hain, taki aapki jeb par extra charge na aaye. Iske liye aap ek baar phir kuch websites ki tulna kar sakte hain.




Email aur Pata :- 

Online shopping ke liye aapke paas Email ID ka hona jaroori hain. Darasal, jab aap koi product online khareedte hain to Email Id ka option aata hain. Yeh isliye jaroori hota hain taki product se judi saari jankari aapke Mail ID par aa jaye. Iske saath, product ki delivery ke liye aisa Address dena chahiye jo delivery boy ko asaani ke saath mil jaye. Halaki, pata na milne ki surat mein vah aapko mobile se contact kar sakte hain.




EMI ka option 

Aap credit card istemal karte hain to Online shopping ke samay EMI ka option choose kar sakte hain. Iska bada fayda yeh hain ki kai product EMI par bhi utni keemat mein hi mil jate hain. Aise mein aapki jeb se ek bhi paisa extra nahi jata hain aur aap EMI bhi asaani se chuka pate hain. EMI bhi 6 mahine, 12 mahine, 18 mahine aur 24 mahine ke options mein de sakte hain.




Payment Security :-

Online shopping ke samay kai logo ko payment security ka darr hota hain. Aise mein agar aap kisi famous website se shopping kar rahe hain to vo apne payment option ko puri tarah secure rakhti hain. Unki site par product aur security se judi certificate bhi rahta hain. Halaki, iske baad bhi aapke mann mein darr hain to aap COD (Cash on Delivery) ka option choon sakte hain. Halaki har product par Cash on Delivery ka option mauzood nahi hota hain.




Trace your Order :- 

Product ki booking karte samay Website uski delivery se judi jankari bhi share karti hain. Yani  aapko uski delivery kitne din mein milegi. Saath hi product booking ke baad vo aapko ek order ID bhi deti hain. Jiski madad se aap apne order ko trace kar sakte hain. Halaki, kai baar samay se pahle hi product aapke paas pahucha diya jata hain.



Post a Comment

  1. This is wonderful. I am not quite much with the internet, but I believe that what I just read is some good material. Thanks for writing such wonderful article. God bless.
    Herbal Potpourri

    ReplyDelete

 
Top